តើរវាង GPU ពពួក nVidia និង AMD គួរជ្រើសរើសយកមួយណា? យើងមានចម្លើយជូន!

ការជ្រើសរើសយកកុំព្យូទ័រមកប្រើប្រាស់ ក្រៅពីពិនិត្យមើលទៅលើផ្នែករឹងធំៗដូចជា CPU, RAM, Motherboard, ទំហំអេក្រង់, កម្រិតរូបភាព, កម្លាំងថ្ម, កម្លាំង Power Supply ជាដើម យើងតែងតែមើលទៅលើផ្នែកសំខាន់មួយផ្សេងទៀតគឺ GPU ដែលខ្មែរយើងតែងតែហៅថា VGA វាគឺជាផ្នែកដ៏សំខាន់មួយសម្រាប់ បំពេញតម្រូវការដល់ការប្រើប្រាស់លើមុខងារជាច្រើនរាប់មិនអស់ ពិសេសមុខងារណាដែកពាក់ព័ន្ធនឹងការប្រើប្រាស់ក្រាហ្វិចធំៗ។ យ៉ាងណាមិញបើមុននឹងសម្រេចចិត្តជ្រើសរើសយក GPU ម៉ូឌែលមួយណាមកប្រើប្រាស់នោះ យើងតែងមើលទៅលើម៉ាករបស់វាជាមុនសិន ហេតុនេះមានអ្នកប្រើប្រាស់ជាច្រើន តែងចោទជាសំនួរមួយថា តើរវាង GPU/VGA របស់ nVIDIA និង AMD តើគួរជ្រើសរើសយកមួយណា?
តាមការពិតទៅម៉ាក nVIDIA និង AMD គឺសុទ្ធសឹងជាម៉ាកល្បី ដែលទទួលបានជោគជ័យច្រើនគួរឲ្យកត់សំគាល់ ដោយពីមួយឆ្នាំទៅមួយឆ្នាំ ក្រាហ្វិចរបស់ក្រុមហ៊ុនទាំង 2 តែងតែធ្វើការឡើងស៊េរីថ្មីៗ ដូច្នេះវាពិតជាពិបាកណាស់ក្នុងការសន្និដ្ឋានថា តើរវាង nVIDIA និង AMD តើគួរយកមួយណា? សម្រាប់ស្រុកខ្មែរយើង ដោយផ្អែកតាមទិដ្ឋភាពសង្គមសព្វថ្ងៃ ផលិតផលឈីបរបស់ nVIDIA គឺមានការពេញនិយមជាង AMD រាប់ទាំងម៉ាស៊ីន Desktop និង Laptop នោះក៏ដោយសារតែគុណភាព និងការណែនាំតាមគ្នា ហើយជាការពិតឈីប GPU របស់ nVIDIA ពិតជាមានលក្ខណៈសម្បត្តិល្អៗច្រើនបើប្រៀបទៅនឹង AMD នោះក៏ដោយសារតែ AMD មានបញ្ហាមួយចំនួនដូចជា៖
- ឈីបមានបញ្ហាផ្នែកកម្ដៅ
មានឈីប AMD មិនតិចនោះទេមានបញ្ហាផ្នែកឡើងកម្ដៅខ្លាំង ពិសេសឈីបជំនាន់មុន ធ្វើឲ្យក្រុមហ៊ុន AMD បាត់បង់ការជឿទុកចិត្តពីសំណាក់អ្នកប្រើប្រាស់មិនតិចនោះទេ។ មកដល់ពេលបច្ចុប្បន្នយើងសង្កេតឃើញថា ឈីប AMD ភាគច្រើនមិនមានបញ្ហាកម្ដៅនោះឡើយ តែក៏នៅមានអតិថិជនមួយចំនួនតូច ត្អូញត្អែរមិនឈប់ពីបញ្ហានោះនៅតាមរយៈ Forum ស្រុកគេដោយរាប់បញ្ចូលទាំងក្រាហ្វិចកាតប្រើប្រាស់ជាមួយ Desktop និងក្រាបហ្ចិចភ្ជាប់មកជាមួយ Laptop។
- កង្វះខាតផ្នែក Driver
អ្នកប្រើប្រាស់ GPU/VGA AMD ភាគច្រើនរួមទាំង Cambo Report ផងដែរ តែងតែជួបបញ្ហាផ្នែក Driver នេះ ដោយវាកើតមានឡើងរាប់សិបឆ្នាំមកហើយ រហូតមកដល់ឆ្នាំ 2016 នេះក៏បញ្ហាមិនទាន់ដោះស្រាយបាននៅឡើយ។ កង្វះខាតផ្នែក Driver នេះធ្វើឲ្យល្បឿនដំណើរការ ក៏ដូចជាមុខងារសំខាន់ៗជាច្រើនរបស់ក្រាហ្វិចកាតបាត់បង់ វាផ្ដល់ផលវិបាកច្រើនទៅលើការប្រើប្រាស់ទាំងមូលតែម្ដង ជាហេតុធ្វើឲ្យអ្នកប្រើប្រាស់ខាតបង់នូវប្រយោជន៍ច្រើនពីវា។
- បច្ចេកវិទ្យាថ្មីៗមានភាពយឿតយ៉ាវ
រាល់ក្រាហ្វិចនីមួយៗ តែមានមុខងារ និងលក្ខណៈសម្បត្តិពិសេសៗជាច្រើនបង្កប់មកជាមួយដូចជា PhysX, G-Sync, Shadow Play, GameStream, nVIDIA’s HairWorks, Game Optimization, Battery Boost និងមុខងារជាច្រើនផ្សេងទៀត ដែលមុខងារទាំងនោះជាទូទៅគឺសុទ្ធសឹងជាមុខងារ ដែលមានបំពាក់មកមុនគេលើឈីប nVIDIA បន្ទាប់មកទើបមាននៅលើឈីបក្រាហ្វិចរបស់ AMD តាមក្រោយ ហេតុនេះវាសបង្ហាញឲ្យឃើញថា AMD នៅពុំទាន់យកឈ្នះ nVIDIA បាននៅឡើយ។ ក៏ប៉ុន្តែក៏មានមុខងារមួយចំនួន AMD បានចេញមុន nVIDIA ដែរ គ្រាន់តែមានតិចតួចប៉ុណ្ណោះ។
- បញ្ហាតម្លៃ
តម្លៃគឺជាចំនុចពិសេសក្នុងការជ្រើសរើសក្រាហ្វិចកាតមកប្រើប្រាស់ ព្រោះវាកំណត់អំពីសមត្ថភាពរបស់ក្រាហ្វិច បើវាមានតម្លៃថ្លៃនោះ ក្រាហ្វិចប្រាកដជាខ្លាំង ហើយជាទូទៅតម្លៃរបស់ក្រុមហ៊ុន nVIDIA និង AMD មានការប្រកួតប្រជែងគ្នាខ្លាំងណាស់ ហើយជាក់ស្ដែង AMD តែងមានតម្លៃរាងថ្លៃជាងឈីប nVIDIA បន្តិច តែ AMD ក៏មានយុទ្ធសាស្ត្រទីផ្សារធ្វើការ Discount ឬបញ្ចុះតម្លៃ យ៉ាងសកម្មផងដែរ តែនៅស្រុកខ្មែរយើងគឺមិនសូវជាថោកប៉ុន្មាននោះទេ។

ខាងលើគឺជាគុណវិបត្តិមួយចំនួនតូចរបស់ AMD តែវាចោទជាបញ្ហាជាច្រើនសម្រាប់ក្រុមហ៊ុនមួយនេះ ក្នុងការគ្រប់គ្រងទីផ្សារឲ្យមានស្ថេរភាព ហើយវាក៏ជាចំនុចសំខាន់មួយដើម្បីឲ្យអ្នកប្រើប្រាស់ទូទៅយកទៅពិចារណា មុននឹងសម្រេចចិត្តទិញម៉ាកណាមួយឲ្យប្រាកដយកមកប្រើប្រាស់។ រីឯចម្លើយថាតើរវាងឈីប nVIDIA និង AMD តើគួរជ្រើសរើសយកមួយណា? ចម្លើយគឺ nVIDIA ព្រោះ GPU/VGA របស់ nVIDIA តែមានគុណសម្បត្តិល្អប្រសើរជាង ថែមទាំងមានការផ្គត់ផ្គង់ផ្នែក Driver បានយ៉ាងល្អប្រសើរ ពិសេសការ Update នូវ Driver ថ្មីតែមកដល់នៅពេលហ្គេមស៊េរីថ្មីៗចេញជាផ្លូវការ ជាហេតុធ្វើឲ្យអតិថិជនជាច្រើនពេញចិត្តខ្លាំង ពិសេសបំផុតនោះគឺវាមានលក្ខណៈសម្បត្តិច្រើនទៅលើការប្រើប្រាស់ជាមួយឧបករណ៍ ហ្គេម nVIDIA Shield, វ៉ែនតា VR និងអាចធ្វើការថតយកហ្គេមតាមរយៈមុខងារ ShadowPlay ថែមទៀត។

គួរបញ្ជាក់ប្រាប់ផងដែរថា ការរៀបរាប់ខាងលើគឺរាប់បញ្ចូលទាំងក្រាហ្វិចកាតរបស់ Desktop និងក្រាហ្វិចរបស់ Laptop ព្រោះឈីបស៊េរីថ្មីៗចាប់ពីជំនាន់ 600 ស៊េរីខ្សែស្រឡាយ GTX ឡើងទៅ បានបំពាក់មកជាមួយមុខងារពិសេសៗមិនចាញ់ឈីបរបស់ Desktop ឡើយ។ ដូច្នេះរាល់ប្រិយមិត្តគ្រោងនឹងទិញកុំព្យូទ័រមកប្រើប្រាស់ អ្នកគប្បីជាវយកម៉ាក nVIDIA វិញល្អជាជាង ព្រោះវាមានគុណភាពប្រសើរជាង ថែមទាំងធ្វើឲ្យហ្គេមរបស់អ្នកមើលទៅកាន់តែដូចពិតៗ ដោយប្រើប្រាស់មុខងារសំខាន់ៗតាមជំនាន់របស់វា តែ AMD ក៏មិនអន់នោះដែរ ទាស់ត្រង់ថាវាមិនសូវជាល្អប៉ុន្មាននោះទេបើប្រៀបធៀបជាមួយ nVIDIA។

ប្រភពពី៖ Cambo-Report

Labels Computer, Ikhnow

News Technology

How To