Kingtel បោះទុនជាង ១៤០លានដុល្លារ ចូលប្រកួតក្នុងទីផ្សារទូរគមនាគមន៍

ក្រុមហ៊ុនទើបតែបង្កើតថ្មី Kingtel Communication Limited បានបោះទុនប្រមាណ ១៤០លានដុល្លារអាមេរិក និងចាប់ផ្តើមផ្គត់ផ្គង់សេវាកម្មអ៊ីនធើណេត ពីថ្ងៃនេះហើយ។ ក្រុមហ៊ុន Kingtel ជាក្រុមហ៊ុនផ្គត់ផ្គង់សេវាកម្ម អ៊ីនធើណេត នឹងទូរគមនាគមន៍ គ្រប់គ្រងដោយក្រុមហ៊ុនមេ KeyBridge International Investment មានមូលដ្ឋាននៅទីក្រុងហុងកុង នេះបើយោងតាមសារព័ត៌មាន Phnom Penh Post។

កាលពីឆ្នាំ ២០១៤ ក្រុមហ៊ុន KeyBridge ទិញភាគហ៊ុន ៦៥ភាគរយរបស់ Emaxx ដែលបច្ចុប្បន្នក្រុមហ៊ុន KeyBridge បានភាគហ៊ុនទាំងស្រុង នឹងដាក់ឲ្យដំណើរការក្រោមឈ្មោះជា Kingtel។

យោងតាមប្រសាសន៍របស់ប្រធានផ្នែកលក់ នឹងទីផ្សារប្រចាំក្រុមហ៊ុន Kingtel បានឲ្យដឹងថា ប្រទេសកម្ពុជា គឺមានសក្តានុពលទាំងសេដ្ឋកិច្ច និងនយោបាយ ដែលអាចឲ្យក្រុមហ៊ុនចាប់ផ្តើមប្រតិបត្តិការ នៅទីនេះបាន ហើយក្រុមហ៊ុន KeyBridge នឹងប្រើប្រាស់បទពិសោធន៍របស់ Emaxx ក្នុងទីផ្សារទូរគមនាគមន៍ ដើម្បីប្រកួតជាមួយក្រុមហ៊ុនដទៃ ដោយប្រើបច្ចេកវិទ្យាថ្មី ក្នុងការផ្គត់ផ្គង់ទិន្នន័យ និងសំលេង ដែលមានគុណភាពខ្ពស់ នឹងមានល្បឿនលឿន។

ក្រុមហ៊ុន Kingtel សហការជាមួយក្រុមហ៊ុន Huawei នឹងក្រុមហ៊ុន Cambodia Fiber Optic Communication Network នឹងផ្តល់ជូននូវអ៊ីនធើណេតល្បឿនលឿន ដែលប្រើប្រាស់ខ្សែកាបអុបទិក នឹងផ្គត់ផ្គង់សេវាទូរស័ព្ទ នៅប្រមាណខែខាងមុខទៀតនេះ។

បច្ចុប្បន្នក្រុមហ៊ុនកំពុងដំណើរការ ក្នុងរាជធានីភ្នំពេញ នឹងបន្តពង្រីកបន្ថែមទៅកាន់ខេត្តក្រុងចំនួន ៧ទៀត ដែលរួមមាន សៀមរាប បាត់ដំបង នឹងក្រុងព្រះសីហនុផងដែរ៕